اوعى حد يقولي ان غزة واللي بيشوفه بيحصل فيها مش يفرق معاك.
سواء كنت عربي مسلم
سواء كنت عربي مسيحي
سواء كنت مش عربي اصلا
كل القلوب تنفطر جرحا وألما على اطفال ونساء ورجال وشيوخ غزة
ده اول كلام كتبته عشان محدش يزايد على حبي وولائي
انا هتكلم انهاردة عن وجهة نظر مختلفة تماماً... وهي وجهة نظر النظام المصري في الموضوع كله
مش هتكلم على حماس اللي قوتها ضعيفة جدا نظريا بصواريخ " طفي النور يا ولية " على رأي الكاتب الكبير ابراهيم حجازي ... لأن مهما كان قوتها ضعيفة نظريا فهي مقاومة وبتدافع عن حق مشروع في ضوء ما أوتي ليها من قوة .
بس انا قبل ما اعرض وجهة نظر النظام الحاكم في مصر .. عايز اسال سؤال محيرني .
اسرائيل عايزة ايه من غزة ؟!! والحرب على غزة ؟!!!
هل غزة مليئة بالبترول والدهب والغاز الطبيعي اللي بيجيلها على طبق من فضة ؟؟
هل غزة بصواريخ اللي اسف اني هكررها ( طفي النور يا ولية ) مسببه رعب في اسرائيل رغم انها مقتلتشي يهودي واحد والصاورخ تحس انه بينزل مكان ما بيطلع ؟
هل غزة دي هي ارض الميعاد اللي اسرائيل عايزة تخدها نظرا لأن الميعاد هيكون فيها ومش هيكون في غيرها ؟!!!
هل وهل وهل وهل وألف هل ؟؟
انا بقي شايف ان ولا هل من اللي فوق دي صح أو سبب يخلي اسرائيل تعمل كده ؟
ومن وجهة نظري المتواضعة التي قد تخطأ أو تصيب ولكن يجب ان تحترم إن هدف اسرائيل حاجة من دول :-
1- مصر تفتح المعابر ويدخل الفلسطنين سيناء ... ولو دخلوا مش هيطلعوا زي ما حصل في جنوب لبنان ,
على عينا وعلى راسنا من فوق بس للاسف ان الهدف ده هتكسب منه اسرائيل حاجات كتير اوي :-
أ- انها هتاخد غزة بيضة مقشرة
ب- أو انها بعد ما تاخد غزة بيضة مقشرة هيبقي الفلسطنين في سيناء .... وطبعا هيكون دخول اسرائيل سيناء في ظل الغوغاء اللي هتحصل بعد دخولهم وضعف الحدود المصرية أمر محتوم
وخصوصوا ان حماس مش هتسكت وهتضرب من سيناء ولما تضرب من سيناء يبقي لأسرائيل حق الرد والدفاع عن نفسها قصاد العالم وتدخل هي كمان سيناء لحد ما نلاقيهم في دمياط عندنا ... وقصاد العالم كله هي الحمل الوديع اللي بيحمي نفسه
2- هدف اسرائيل التاني هو ان غزة ترجع تحت السيادة المصرية من جديد ( زي زمان ارجعوا للتاريخ ) وتبقي محافظة مصرية زي شمال سيناء وجنوب سيناء وكده وبرضه ليهم مكسبين :-
أ- ان حماس عمرها ولا شعب غزة هيقبلوا يبقوا تبع مصر ويتخلوا عن هويتهم الفلسطينية وهتحس انها محتلة من مصر بدل اسرائيل ويلطشوا في بعض .
ب- ان حماس هتقبل الوضع بس برضه هتضرب اسرائيل من غزة وهي تحت السيادة المصرية وهيكون ليها برده حق الرد على اي حتة من محافظات مصر ... وطبعا مصر مش هتسمح بده .. خوفاً من اي ضرب اسرائيلي لمحافظات مصرية او حتى سيناء... فهتضطر انها تقمع حركة حماس بالشرطة زي ما بيتقمع بقيت الحركات المشابهة في مصر ووقتها برضه هيبقي نلطش في بعض
وفي كل الاحوال كله بيصب في مصلحة اسرائيل والعرب نايمين يقولوا على المصريين خونة وعملاء ونايمين في العسل وعايمين في بترول وشيلي يا مصر الليلة
يا اخونا قليلا من العقل والتريث .... فلسطين في عنينا ... ومفيش مصري مش بيحب فلسطين ولا قلبه بينفطر على اللي بيحصل فيها .
بس فكروا في اللي قولته وشوفوا الحل ايه ؟!!!! ولو مصر فعلا غلطانه وخاينة زي ما العرب بيقولوا ؟؟ يا تري هما وضعهم ايه ؟؟؟
سؤال ساذج : ايران من اكثر الدول المؤيدين لحماس وحزب الله وبتمدهم بالاسلحة والقوى ... ومن مصلحتها ان حماس تكون موجودة ؟؟؟
هل هتتخلى ايران عن حماس في مقابل انها تعيش في سلام حتى و لو مؤقت .... يعني تحرق كارت وتحافظ على بقيت الورق ؟ ولا تحاول تحافظ على الكارت وتحرق كل الورق ؟!!
ورائيي ان ايران مش هتقدر ترفع حتى جزمة منتظر الزيدي في وش اسرائيل لأن تاني يوم هتلاقي الدك عليها من كل حتة ؟؟؟
بس ممكن تساعد حزب الله ... ويضرب ضربة متوقعة لأسرائيل ... تخف من الحكاية شويا على غزة ... وده في ضوء رفض مصر التام فتح المعابر اللي هو من أهداف ايران برضه ... وبكده حماس هتنتهي .... وطول ما مصر مصرة عدم فتح معابر .. يبقي توقع ضربة من حزب الله حفاظا على مصالح ايران العظمي .
في النهاية دي وجهة نظري واحب اسمع ارائكم
على فكرة : عايزين الحل هتلقوه في البوست ده http://farkshawe.blogspot.com/
على فكرة برضه مش بتاعي انا قريته بعد ما كتبت المقال ونشرته كمان ... بس بجد هو ده الحل السليم
هناك 18 تعليقًا:
السلام عليكم ورحمه الله وبركاته
أمه لا اله الا الله بخير ...هدانا الله واياكم للصراط المستقيم.شكرا لك دللتنا علي خير هداك الله واعزك.
سلام الله عليكم ورحمته وبركاته
__________________
أشكرك اخي الكريم علي زيارتك الكريمه لمدونتي المتواضعه.وعلي تعليقكم الجميل .
جزاك الله خيرا علي ما قلت في مقالك وهدانا الله واياكم الي سواء السبيل ...وشاكرا لك ما صنعته بوضع وصله كلماتي المتواضعه بعد مقالكم الهادف والبناء.
جعلنا الله واياكم ممن يحبون الحق ويدلون عليه ....شكرا لك.
بصراحه كسبنا شخصيه عاقله جدا
ربنا ينصرنا فىفلسطين ويارب ويعز بنا الاسلام والمسلمين يااااااااارب
السلام عليكم ورحمه الله وبركاته
__________________
أسعدتني زيارتكم الكريمه لمدونتي المتواضعه...كما امتعني رأيكم الواعي.
أشكركم علي اضافه الرابط لموضوعي ووفقنا الله واياكم وهدانا لما فيه خير ديننا.
طلما انت قلت لو عجبك اتكلم لو معجبكش اتكلم بردو انت اللي قلت
هو كلامك منطقي واول مره اخد بالي من الفكره نفسها انا مفهمش في السياسه
بس فعلا وجهه نظر بردو وممكن جدا جدا تكون سليمه
عارف كل اللي نفسي فيه ايه بجد
نعيش بقي في سلام ويتهدوا الناس دي وتروح في داهيه والاطفال تعيش زي اي طفل عربي من حقه يشعر بالامن والسلام وسط اهله وكفايه خراب ودمار والناس تفوق بقي وتصحي هنفضل نيمين لحد امتي بجد حجات تخلي الواحد منخوق ومضايق بس بيقول بردو الامل كبير وعندنا امل في ربنا سبحانه وتعالي كبير اوي اوي
تحياتي واسفه علي الاطاله
بجدوجهة نظر سليمة ومنطقية جدا
عارف انا رأيي ان الح مع اسرائيل هوالحرب
بس مش دلوقتي لما نكون حكومة وشعب مستعدين له
وكمان العرب كلهم يوحدو كلمتهم ماينفعش مصر لوحدها اللي تشيل الليلة
مصر ضحت علشان العرب كتير قوي بس لكل شيئ طاقة وحدود وزي حماس مابتعلب على جميع الأطراف ايران شوية وحزب الله شوية ودول الخليج شويةوتيجي تتمسح في مصر شوية احنا كمان لازم ندور على مصلحتنا الأول
لا مؤاخذة يعني مصر فوق الجميع والكلام دة مايزعلش حد
تدوين في الجول
وتعيشلنا وتكتب
- ارجو انك تشيل تأكيد الكلمة لسهولة التعليق
السلام عليكم
اشكرك على مرورك الكريم بمدونتنا وكلماتك الرقيقة
واشكرك ايضا على هذذا البوست والتحليل الواقعى والمنطقى جدا للموقف المصرى ولواجب تفهمه والاقتناع به ولكن لابد من اتحاد الموقف العربى والاتفاق حتى ولو مرة واحدة قبل فوات الاوان
شكرا بجد لتعليقكم المحترم اللي نور مدونتي المتواضعة
اخيكم عابد
بجد بوست رائع احييك عليةونورتني بزيارتك ويارب دايما ووجهة نظر لم تكن في حسباني جزاك الله خيرا اخي
دمت بالف خير
عابد انا بصراحة لسة ماقريتش البوست
انا بس جيت اسلم عليك
واقولك انى هاقرا البوست بكرة بعد ما ارجع البيت من مشوار الهلال الاحمر
انا دلوقتى تعبانة جدا ومش قادرة ابص قدامى
هدخل اناااااااااااااااام
استنى منى تعليق تانى بعد القراية
سلام
اختك خيخة
حسبى الله ونعم الوكيل
وربنا يورينا يوم فى الظالم
نفسى بجد ان الحرب دى يكون فيها نهايه اسرائيل
السلام عليكم
جزاكم الله خيرا لزيارة مدونتى
اخى فى الله اذا لم يكن الان وقت الحماسة والتضحية
فمتى اذا
اقول لك
يا امة العرب افناكمتاخذكم الى الخلاف
فمن ذا احرز القصدا
يمزق الطفل تمزيقا
فما زرفت عين السياسة
او ابدت له غضبا
شكرا لمرورك اللطيف على مدونتي المتواضعة
اما بالنسبةلهجوم اسرائيل لغزة له اعتبارات عديدة انت قلتها واضف عليها
ان اسرائيل تريد موازنة مع ما حصل لها في تموز 2006 بحربها مع لبنان
طبعا لا تقبل الخسارةوتريد رد الاعتبار
وايضا يا صديقي كما نعلم جميعا ان اسرائيل هدفها الاساسي والتي تعمل عليه بالتدريج منذ وعد بلفور انها تريد ابادة الشعب الفلسطيني باكمله وتهجيره لانها تريد الارض التي رفضت كل الدول العظمى الداعمة لها ان تعطيها ولو حق صغير في اراضيها
ولانهم يعرفون مدى حقارة هذا الشعب الاسرائيلي
والا لما عدد الشهداء الاطفال اكثر من النساء والرجال والشيوخ
لانهم يخافون من ان يكبرو وبيدهم حجرة تقذفهم بها ولانهم جبناء
اللهم انصر غزة العزة
اللهم اهدي كل العرب
اللهم ادخل الفرح الى قلوبنا
ووحد صفوفنا
امين
شكرا
السلام عليكم و رحمة الله و بركاته
اشكرك اخى الفاضل لزيارتك الكريمه التى اسعدتنى بمعرفتى لشخصيه واعيه و مثقفه كسيادتك ..
كلام حضرتك منطقى جدا و له كل الاحترام و التقدير و لكن الى متى سنستطيع ان نتحمل مشاهد الاطفال و هم يثتغيثون فما من مجيب و مناظر اشلاء الجثث لأخواتنا متناثره هنا و هناك
ليس لنا الا الرحمن و الدعاء و التضرع له حتى يأذن الرحمن فأكيد هناك حكمه من الله سبحانه فى كل ما يجرى ..
اشكرك لتوضيح الصوره بشكل عقلانى و متفهم .. جزاك الله خيرا و اعزك و هدانا جميعا لما فيه الخير و حفظ بلادنا من كل سؤ
تحياتى
بجد كل وجهات النظر متساوية
كل ما اقرأ نقطة
اقول صحيح و الله
فعلا تحليل ممتاز
بس يا تري ايه السيناريو الصح
أولا ارحب بحضرتك في عالم التدوين
فأهلا بك
ثانيا حضرتك أثرت نقاط كثيرة بالطبع أحترم راي حضرت واحترم كون لحضرتك راي من الاساس فقليل هم اصحاب الراي الآن
المهم
النقطة الأولي
بالطبع اي انسان ذو ضمير حي سيثيره مايحدث في غزة ويحرك مشاعره وأفعاله ايضا
النقطة الثانية:
صواريخ حماس مش طفي النور يا ولية ولا اي حاجة حضرتك لو شفت لآثارها في وكاللات الانباء و مواقع الانترنت هتلاقي انها حقا صواريخ فاعلة
أولا : تخبر العدو الصهيوني أنه حتي الرمق الاخير هناك مقاومة
ثانيا : هناك حقا اصابات وقتلي ولو كان العدد بسيطا ولكنها تصيب الكم الاكبر بالرعب لدرجة ان نصف المستوطنات الان تعيش في المخابئ وده كلام الصحف الصهيونية
أما النقطة الثالثة فهي اسرائيل عاوزة ايه من غزة:
أولا : اسرائيل عاوزة تخضع من بقي من حكومات المنطقة لسلطتها وبم انه مش فاضل غير حكومة حماس في غزة فلازم تخليها تخضع
ثانيا : غزة فيها الاكبر من البترول والغاز وكل ده , غزة فيها اسلام , فيها مقاومة فيها ممانعة فيها ارادة فيها حكومة اسلامية
وده اخطر علي اسرائيل ونظرية الأمن اللي بالطبع اصبحت تهددها حماس خاصة وان مدي صواريخها اصبح 45 كم أي أن هناك مليون يهودي في مرمي الصواريخ
النقطة الرابعة
لا يمكن علي فكرة أهل غزة ييجوا مصر ويسيبوها لاسباب كتيرة جدا
منها:
انهم متمسكين بالارض لدرجة انهم يفصلوا ان يدفنوا فيها علي ان يخرجوا منها واسال اصغر طفل في غزة هيقول لحضرتك الكلام ده
ثانيا : اذا كانت مصر مش راضية تفتحلهم المعبر للمساعدات يبقي هتدخلهم؟
كمان اللي يخلي حماس تقاوم ده كله وما تنضمش لتيار عباس الخياني هو انهم مش عاوزين يسيبوا غزة واتمسكوا بيها
كمان اسرائيل مش عاوزة مصر تفتح المعبر والا ماكانتش نشرت قواتها ودبابتها في الجانب الفلسطيني من المعبر
كانت سابت الطريق مفتوح
ويبقي في اعتقادي ان كل افتراضات حضرتك المبنية علي دخول اهل غزة مصر غير مبررة
لانن استحالة هيحصل لانه الفلسطيني قدمه اثبت من جذور الزيتون في ارضه
والعالم كله يشهد
-------------
ولو حضرتك مش مصدق انه خكومة مصر عميلة مخاينة ومصدق الهبل اللي بيطلعوا يقولوه في القنوات الفضائية والارضية الغبية بتاعتنا يبقي عليه العوض بجد
وعلي فكرة مش حكومة مصر بس
اي دولة عربية كان هيكون المعبر علي حدودها كانت هتعمل ده والدليل ان مافيش حد منهم حتي طرد سفير ولا حتي هددد بده
حتي سوريا اللي هي من الد اعداء اسرائيل ما عملتهاش
ومن الحاجات اللي مخلية حكومتنا قالبة علي حماس انها اخوان يعني الحكومة بتخلص تارها مع الاخوان في حماس
والمبادرة المصرية الفاشلة والمفاوضات ما بداتش غير لما لقوا اسرائيل ما محققتش هدفها الاساسي اللي هو كسر المقاومة
أخر نقطة
حماس وايران
؟؟؟؟؟؟؟؟؟؟؟؟؟؟؟؟؟
حماس عمرها علي فكرة ماكانت كارت في ايد حد وخاصة ايران
وعمر حماس ماكان ارتباطها بايران
حماس اسسها الاخوان المسلمون في فلسطين
يعني سنة وايران شيعة , وان كان حد مفكر ان ايران بتستخدم حماس علشان نفوذها يبقي غلطان وبيسمع كلام التلفزيون المصري الهابط
الاخوان دعوة عمرها 80 سنة والثورة الاسلامية في ايران 30 سنة
الاخوان الاسبق ده غير الاختلاف والفروق الشاسعة بين الاتنين
وعلي فكرة لانعول علي ايران كثيرا في مساعدتها لحماس ولا كانت حماس في عمرها مستندة علي ايران
--------------
وفي الآخر
اتمني بقي نبطل نتكلم بلهجة انا مصري وانت فلسطيني والسعودية وحشة وسوريا بعبع
يا جماعة عاوزين نسمع كلمة
احنا مسلمـــــــــــــــــــين
أنا مسلم
مسلم
مسلم
قبل كل شئ
ويكفينا حديث
"ذمة المسلمين واحدة, فمن أخفر مسلما فعليه لعنة الله والملائكة والناس أجمعين, لا يقبل منه صرف ولا عدل"
اي من خذل أخاه المسلم
و "اذا جاع المسلمون فلامال لاحد"
وبدل مانبرر للحكومة موقفها
نشوف ايه اللي نقدر نقدمه لاخواننا
بدل مانتكلم عنهم بلهجة يا حرام وياعيني والله صعبانين علينا
ده وااااااااااااااااااجب علينا مساعدتهم
والله هنتحاسب عليهم
أخي الكريم
لو حضرتك يوم القيامة داخل الجنة وجالك طفل فلسطيني قتل غدرا يسالك انت كنت فين لما انا اتقتلت
وماكنتش عملت حاجة
هيحاجك امام الله , ووقتها الله اعلم لما ربنا يحاسبنا عليهم هنبقي برضه في الجنة زي ماكنا داخلينها ولا ....... نعوذ بالله من أن نخذل جنود الحق
أخي
لو بحثت في العالم كله عن أحد يقف أمام عدونا "المشترك " لن تجد الا حماس والمقاومة في فلسطين
فلنتق الله في الفئة المرابطة ونوفيها حقها
ولنتذكر:
أنــــــــــــــا مســــــــــــلم
-------------------
أحييك مرة اخري علي رايك
وعلي مدونتك
وآسفة طولت
بس حضرتك اللي طلبت وجهة نظرنا
الظاهر اني عندي طول نظر :)
ازيك يا عابد
معلش اتأخرت عليك
بس بينى وبينك كنت هانسى خالص
ارجع لك تانى واقرا البوست
المهم يا عابد
مش انا قريت البوست
و
ها
ايه
أأأأأأأأأأأه
ده كان رد فعلى لما خلصت قرأة البوست بتاعك
من الاخر كدة وجهة نظرك منطقية جدا
بس مش عارفة ليه يا عابد انا بقى عندى دايما حالة شك فى حكومتنا
بقى عندى احساس اتحول ليقين ان دايما حكومتنا خاينة ومتأمرة
مش عارفة ليه
يمكن بسبب ان فيه بينهم وبين بعض تجارة ورجال اعمال رايحة ورجال اعمال جاية
واتفاقية الكويز اللى ماشية الله ينور
يمكن علشان حكومتنا مش بتبين الحقايق زى ما انت موضحها كدة
ده لو اعتبرنا ان اللى انت بتقوله هو ده فعلا اللى فى نية حكومتنا
يمكن علشان جكومتنا مش بتقول بصوت عالى بنكرهك يا اسرائيل
كلامك منطقى جدا
بس احنا اللى مبقناش واثقين فى نية الحكومة
تحياتى ليك
سلام
اختك خيخة
والله ان اهلكم واخوانكم في غزة بأفضل حال رغم مصابهم الجلل
والله انهم ليسجدون لله شكرا لنعمه عليهم بأن جعلهم اصحاب هذه الارض الطيبة المباركة ، والحمد لله على نعمه
اتقبل شعورك الطيب اتجاه غزة واهلها ، وانه والله شعور كل مسلم كربم شريف يأبى العيش تحت الذل والهوان
حفظكم الله ورعاكم..
لا تنسوا اخوانكم في غزة من دعائكم
||..بحــر الدموع..||
إرسال تعليق